Post
Abanye-Congo 58% barihebye, ntibabona ahazaza ha RDC
Ubu bushakashatsi bwasohotse ku wa 28 Kamena 2026 bwakorewe ku Banye-Congo 1.350 bo mu ntara 26 zose zigize RDC muri Mata uyu mwaka, hagamijwe kumenya uko abaturage batekereza ku hazaza h’iki gihugu cyugarijwe n’uruhuri rw’ibibazo birimo iby’umutekano muke, ubukene n’ibyorezo.
Abanye-Congo 58% mu bakoreweho ubu bushakashatsi bagaragaje ko babona igihugu cyabo kigana ahabi, mu gihe 39% bo babwiye abashakashatsi ko babona kigana aheza.
Umubare w’Abanye-Congo batizeye ahazaza heza h’igihugu cyabo warazamutse mu myaka ibiri ishize kuko ubushakashatsi bwakozwe muri Mata 2024 bwo bwari bwagaragaje ko abari barihebye bari 49%.
Abatuye mu Ntara ya Kasaï Occidental ari bo bafitiye icyizere cyinshi ahazaza h’igihugu kuko bari ku gipimo cya 63%. Hakurikiraho Kasaï-Oriental iri kuri 52%, Kinshasa iri kuri 47% na Bas-Congo iri kuri 45%.
Intara ya Kivu y’Amajyepfo ifite igice kinini kigenzurwa n’ihuriro AFC/M23 ni yo irimo bake cyane bizeye ahazaza ha RDC kuko bari kuri 11%, ikurikirwa na Kivu y’Amajyaruguru iri kuri 11%, Equateur iri kuri 28% na Ituri iri kuri 37%.
Abashakashatsi babajije Abanye-Congo impamvu batizeye ahazaza h’igihugu cyabo, basobanura ko harimo imiyoborere mibi. Bavuze ko guverinoma ari rwo rwego rwamunzwe na ruswa kurusha izindi kuko yihariye 22%, igakurikirwa n’ubucamanza buri kuri 18% n’umutwe w’abadepite uri kuri 16%.
Mu nzego abaturage bashinja kumungwa na ruswa kandi, Polisi y’igihugu ifite 11%, igisirikare kikagira 10%, ibiro by’Umukuru w’Igihugu bikagira 7%, Sena ikagira 3%.
Abanye-Congo 52% bagaragaje ko bafite ubukene bwinshi, basobanura ko mu midugudu yabo bwageze ku gipimo cya 70%, igipimo cy’ubushomeri kigera kuri 71% mu 2026 ugereranyije no mu 2024.
Ku nzego zizewe, Abanye-Congo bagaragaje ko bizeye itangazamakuru ku gipimo cya 76%, igisirikare kuri 75%, amadini n’amatorero kuri 72%, sosiyete sivile kuri 67%, ariko ko 60% batizeye imitwe ya politiki ikorera muri iki gihugu.
Ku ngingo y’umutekano, abashyigikiye intambara baragabanyutse cyane. Muri Mata 2024, bari 52% ariko nyuma y’imyaka ibiri Abanye-Congo 70% bagaragaje ko bashyigikiye ibiganiro by’amahoro biherekejwe n’igitutu cya dipolomasi.
Abagabo 33% ni bo bashyigikiye ko intambara ikomeza, kandi abagabo 67% bifuza ko Leta ya RDC yakomeza guha imitwe ya Wazalendo intwaro.
Abanye-Congo 64% bizera ko hashingiwe ku masezerano y’amahoro ya Washington, Amerika yagira uruhare mu guhagarika intambara yo mu burasirazuba bw’igihugu ariko mu gihe Abanyamerika bahabwa amabuye y’agaciro.

