IGIHE Kinyarwanda

{Abanyamerika babiri Mark Howard na David Ruoff baburanira Béatrice Munyenyezi umugore wa Arsene Shalom Ntahobari, ushinjwa ibyaha bya Jenoside yakorewe Abatutsi, bari mu Rwanda aho baje kuvugana n’abantangabuhamya.}

Nkuko byatangajwe na The New Times, aba banyamategeko baje gukusanya amakuru ku batangabuhamya bazerekeza i New Hampshire mu kwezi gutaha mu gikorwa cyo gutanga amakuru mu rubanza rwa Munyenyezi utuye mu Mujyi wa Manchester.

Mu mwaka wa 2010 Munyenyezi Béatrice, yarezwe ibyaha byo gutanga umwirondoro utari wo ubwo yuzuzaga impapuro zo kwaka ubwenegihugu bwa Leta Zunz’Ubumwe Z’ Amerika.

Abashinjacyaha b’ Abanyamerika basuye u Rwanda mu gihe gishize baje gukora iperereza ku byaha Munyenyezi aregwa, bavuga ko yatanze amabwiriza yo kwica no gufata ku ngufu muri Jenoside yakorewe Abatutsi Rwanda mu mwaka w’1994, ariko we yahakanye uruhare urwo ari rwo rwose mu bwicanyi ubwo yasabaga ubwenegihugu.

Bivuze ko Béeatrice Munyenyezi ashinjwa ibyaha bibiri, ari byo: Kubeshya ubwo yuzuzaga impapuro zisaba ubwenegihugu no kugira uruhare muri Jenoside yakorewe Abatutsi.

Munyenyezi Béatrice, ni umugore wa Arsene Shalom Ntahobari akaba n’umukazana wa Pauline Nyiramasuhuko, bombi bahamijwe n’ibyaha bya Jenoside yakorewe Abatutsi n’Urukiko Mpanabyaha rwashyiriweho u Rwanda (TPIR) ruri Arusha muri Tanzaniya.

Nyiramasuko Pauline niwe mugore wa mbere wafashwe n’uru rukiko rwa TPIR aregwa ibyaha bya jenoside yakorewe Abatutsi no gushiskariza abantu gufata ku ngufu. Yaje gukatirwa igifungo cya burundu n’uru rukiko ku itariki 24 Kanama 2011.