Post
Umugabo usa na Hitler yajyanywe mu nkiko azira gushishikariza abandi urwango
Uyu Muholandi amaze imyaka myinshi ajya mu Budage aho aba yitabiriye ibikorwa bitandukanye by’ubuhezanguni ndetse ntiyihisha iyo agaragaza uburyo yihebeye uwahoze ayobora Abanazi, Adolf Hitler.
Ku wa 19 Nyakanga, Bild yifashishije amagambo y’Umuyobozi Wungirije w’Urukiko rw’Akarere ka Munster, Matthias Bieling, yemeje ko iburanisha rya mbere ry’uru rubanza riteganyijwe ku wa 24 Nyakanga.
Inzego z’ubutabera mu Budage zatangiye gukurikirana Wijkamp kubera ikiganiro yahaye umwe mu bakoresha YouTube mu myigaragambyo y’abahezanguni yabereye i Munster mu mpeshyi ishize.
Muri icyo kiganiro, uyu mugabo usa na Hitler yavuze ko “urukundo akunda u Budage rwitwa Adolf Hitler”, amwita igitangaza Isi yagize, utagereranywa akaba umunyabwenge.
Muri iki gihe mu Budage, gutakagiza Abanazi n’abahoze ari abayobozi babo ntibifatwa nk’ubwisanzure bwo gutanga ibitekerezo, ahubwo bifatwa nk’icyaha gihanishwa igifungo kigera ku myaka itatu cyangwa ihazabu.
Mu gihe Wijkamp atakwitaba urukiko, hashobora gutangwa impapuro zo kumuta muri yombi.
Wijkamp amaze imyaka igera ku 10 yitabira kenshi ibikorwa by’abahezanguni mu Budage. Bivugwa kandi ko yigeze kwinjira mu ishyaka rya neo-Nazi ryasheshwe rikitwa ‘Die Rechte’ ndetse akaba yarigeze kuba umwe mu bagize ubuyobozi bwaryo mu gihe runaka.
