IGIHE Kinyarwanda

{Nyuma yo guhura muri shampiyona yo mu cyiciro cya mbere mu Bwongereza mu mupira w’amaguru ku ya 23 Ukwakira umwaka ushize, Manchester City ikanyagira bikomeye mukeba wayo Manchester United ibitego 6 kuri 1 zigiye guhura muri FA Cup, igikombe gitegurwa n’ishyirahamwe ry’umupira w’amaguru muri iki gihugu.}

Uyu mukino uri buhuze amakipe yo mu mujyi umwe wa Manchester kuri iki cyumweru ku munsi wa gatatu w’iki gikombe, urabera ku kibuga Etihad Stadium cya Manchester City ukaza gutangira ku isaha ya saa cyenda ku isaha y’i Kigali.

Ikipe ya Manchester United itari kwitwara neza muri iyi minsi kuko imaze gutsindwa imikino ibiri yikurikiranya muri shampiyona bidakunze kubaho, irasabwa gutsinda uyu mukino kugira ngo igarurire abafana bayo icyizere.

Ku ruhande rwa Man City abakinnyi nka Kolo na Yaya Toure bagiye gukina CAN, Gareth Barry ari mu gihano naho Owen Hargreaves, Mario Balotelli bafite imvune mu gihe Samir Nasri na Edin Dzeko bashobora kuza kugaragara muri uyu mukino.

Ku ruhande rwa Man U abakinnyi nka Chris Smalling, Jonny Evans, Nemanja Vidic, Darren Fletcher, Fabio, Michael Owen na Ashley Young ntibahari.

{{Abakinnyi bashobora kubanza mu kibuga ku mpande zombi ni aba:}}

{{Manchester City:}} Hart, Richards, Kompany, Lescott, Clichy, Nasri, De Jong, Milner, Silva, Aguero na Dzeko.

{{Manchester United:}} De Gea, Valencia, Jones, Ferdinand, Evra, Park, Carrick, Anderson, Nani, Rooney na Welbeck.

Manchester United ikaba ariyo ifite iki gikombe inshuro nyinshi zigera kuri 11 ariko Manchester City ikaba ariyo ikibitse kuko yagitwaye umwaka ushize yari imaze imyaka 35 idatwara igikombe icyo aricyo cyose.