IGIHE Kinyarwanda

{Urwego rw’igihugu rushinzwe abinjira n’abasohoka rwashyize ahagaragara urwandiko rushya rw’inzira ‘Laissez-passer’ rumeze nk’agatabo ka ‘Passport’ isanzwe.}

Iki gikorwa kije nk’imwe muri gahunda za Guverinoma zigamije guha abaturage serivisi nziza kandi zihuse, byose birangajwe imbere n’ikoranabuhanga.

Laissez-passer nshya yatangiye gukoreshwa kuva kuri uyu wa Mbere tariki ya 2 Mutarama, ifite umwihariko dore ko ije yari ikenewe nk’uko bitangazwa na Anaclet Kalibata, Umuyobozi mukuru w’Urwego rushinzwe abinjira n’abasohoka.

Mu kiganiro yagiranye n’abanyamakuru kuri uyu wa Kabiri tariki ya 3 Mutarama 2012, Kalibata yagize ati: “Iyi Laissez-passer nshya izajya igurwa amafaranga ibihumbi 10 ku muntu urengeje imyaka 16, n’ibihumbi 5 ku mwana. Mu by’ukuri twavuga ko ije yari ikenewe kuko isanzwe yari yandikishije intoki ari nayo mpamvu byari byoroshye kuyigana”.

Akomeza kuvuga ku itandukaniro riri hagati y’urwandiko rusanzwe n’urushya, Kalibata yagize ati: “uru rwandiko ruzaba rufite agaciro k’imyaka 2 mu gihe urusanzwe rwari umwaka 1.

Urusanzwe rwari igipapuro ku buryo ku ruhande rw’abaturage rwashoboraga gucika byoroshye, naho ku ruhande rwacu (immigration) byari byoroshye kurwigana ku buryo rwashoboraga gukoreshwa mu bikorwa by’urugomo nko gucuruza abantu (human trafficking) ndetse n’iterabwoba (terrorism)”.

Laissez-passer nshya ifite umutekano uhagije, dore ko isomwa n’ibyuma kabuhariwe nk’uko bisanzwe bikorwa kuri za passports, ndetse ibitse umwirondoro wose ugaragara ku ndangamuntu. Usibye kandi ibihugu 5 dusanzwe tumenyereye aribyo Burundi, Uganda, Congo,Tanzania, na Kenya; iyi Laisser-passer izajya yambutsa Umunyarwanda ubyifuza imugeze mu gihugu cya Sudan y’Amajyepfo.

Abaturage bayakiriye bate?

Mu kiganiro IGIHE.com yagiranye n’abaturage batandukanye bari ku biro by’Urwego rushinzwe abinjira n’abasohoka, bategereje guhabwa ibyangombwa byabo; bagaragaje uko bakiriye uru rwandiko rushya.

Uwanjye Larissa yagize ati: “Njye narwishimiye kuko urusanzwe rwangoraka kurubika kubera ukuntu rwari runini, ndumva rwose amafaranga ibihumbi 10 ari ayo. Ntabwo twahenzwe”.

Twaganiriye kandi n’undi muturage wagize ati: “iyi Laissez-passer ni nziza ariko irahenze. Twese siko tujyenda tugiye gutinda, nta n’ubwo ariko twese tujyenda kenshi. Wenda ku munyeshuri cyangwa umucuruzi wambuka kenshi nta gihombo kirimo, ariko na none bagakwiye kureba uburyo hashyirwaho iza make kuri abo bantu bambuka nka rimwe mu myaka 2».

Hamwe no gushyiraho uru rwandiko rushya, Ubuyobozi bw’Urwego rushinzwe abinjira n’abasohoka ruvuga ko inzandiko z’ingoboka kimwe na ‘Boarder pass’ zihabwa abaturage baturiye umupaka, byose bizakomeza gutangwa kandi bigatangirwa ubuntu nk’ibisanzwe.

Naho umuturage ufite laissez-passer ishaje kandi igihe cyayo (validity) kitararangira, azakomeza ayikoreshe kugeza itaye agaciro.